ಇತ್ತೀಚಿನ ದಿನಗಳಲ್ಲಿ ಸೈಬರ್ ವಂಚಕರು ಮುಗ್ಧ ಜನರನ್ನು, ಅದರಲ್ಲೂ ರೈತರನ್ನು ಗುರಿಯಾಗಿಸಿಕೊಂಡು ವಂಚಿಸುತ್ತಿರುವುದು ತೀವ್ರ ಕಳವಳ ಮೂಡಿಸಿದೆ. ಶೇರು ಮಾರುಕಟ್ಟೆ (Share Market) ಹಾಗೂ ಟ್ರೇಡಿಂಗ್ ಹೆಸರಿನಲ್ಲಿ ಶಿವಮೊಗ್ಗದ ರೈತರೊಬ್ಬರಿಗೆ ಬರೋಬ್ಬರಿ 9.91 ಲಕ್ಷ ರೂಪಾಯಿ ವಂಚಿಸಿರುವ ಆಘಾತಕಾರಿ (Shivamogga cyber crime) ಘಟನೆಯೊಂದು ಬೆಳಕಿಗೆ ಬಂದಿದೆ.
ಈ ಕುರಿತು ಶಿವಮೊಗ್ಗದ ಸಿಇಎನ್ (CEN) ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಘಟನೆಯ ಸಂಪೂರ್ಣ ವಿವರ ಇಲ್ಲಿದೆ.
ವಾಟ್ಸಪ್ ಗ್ರೂಪ್ ಮೂಲಕ ಬಿದ್ದ ಬಲೆ!
ಕಳೆದ ಮಾರ್ಚ್ ತಿಂಗಳಲ್ಲಿ ಸಂತ್ರಸ್ತ ಕೃಷಿಕರು ತಮ್ಮ ಮೊಬೈಲ್ನಲ್ಲಿ ವಾಟ್ಸಪ್ ನೋಡುತ್ತಿದ್ದಾಗ, ಅಪರಿಚಿತ ವ್ಯಕ್ತಿಗಳು ಇವರ ನಂಬರ್ ಅನ್ನು ‘ವಿಐಪಿ’ ಹೆಸರಿನ ವಾಟ್ಸಪ್ ಗ್ರೂಪ್ವೊಂದಕ್ಕೆ ಸೇರಿಸಿದ್ದಾರೆ. ಆ ಗ್ರೂಪ್ನಲ್ಲಿ ಪ್ರಸಿದ್ಧ ಟ್ರೇಡಿಂಗ್ ಕಂಪನಿಯೊಂದರ ಹೆಸರಿನಲ್ಲಿ ಆಕರ್ಷಕ ಮೆಸೇಜ್ಗಳನ್ನು ಕಳುಹಿಸಲಾಗುತ್ತಿತ್ತು.
ತಾವು ಆ ಕಂಪನಿಯ ಅಧಿಕೃತ ಪ್ರತಿನಿಧಿಗಳು ಎಂದು ನಂಬಿಸಿದ ಸೈಬರ್ ಕಳ್ಳರು, “ನಮ್ಮ ಕಂಪನಿಯಲ್ಲಿ ಹಣ ಹೂಡಿಕೆ ಮಾಡಿದರೆ ಅತಿ ಕಡಿಮೆ ಅವಧಿಯಲ್ಲಿ ಹೆಚ್ವು ಲಾಭ ಗಳಿಸಬಹುದು” ಎಂದು ರೈತನಿಗೆ ಆಮಿಷ ಒಡ್ಡಿದ್ದಾರೆ.
4 ಹಂತಗಳಲ್ಲಿ ಹಣ ವರ್ಗಾವಣೆ
ವಂಚಕರ ಮಾತುಗಳನ್ನು ನಿಜವೆಂದು ನಂಬಿದ ರೈತ, ಹೆಚ್ಚಿನ ಲಾಭದ ಆಸೆಗೆ ಬಿದ್ದು ಮಾರ್ಚ್ 20 ರಿಂದ ಮೇ 15 ರ ಅವಧಿಯಲ್ಲಿ ವಂಚಕರು ನೀಡಿದ ವಿವಿಧ ಬ್ಯಾಂಕ್ ಖಾತೆಗಳಿಗೆ ಹಂತ-ಹಂತವಾಗಿ ಹಣ ಕಳುಹಿಸಿದ್ದಾರೆ. ಒಟ್ಟು 9,91,081 ರೂಪಾಯಿಗಳನ್ನು ಸೈಬರ್ ಕಳ್ಳರ ಖಾತೆಗೆ ವರ್ಗಾವಣೆ ಮಾಡಿದ್ದಾರೆ.
ವಿತ್ಡ್ರಾ ಮಾಡಲು ಹೋದಾಗ ಅಸಲಿ ಆಟ ಶುರು!
ತಮ್ಮ ಖಾತೆಯಲ್ಲಿ ಲಾಭದ ಹಣ ತೋರಿಸುತ್ತಿದ್ದನ್ನು ಕಂಡು ಕೃಷಿಕರು ಅದನ್ನು ಬ್ಯಾಂಕ್ ಖಾತೆಗೆ ವಿತ್ಡ್ರಾ (Withdraw) ಮಾಡಲು ಯತ್ನಿಸಿದ್ದಾರೆ. ಆದರೆ ಈ ವೇಳೆ ವಂಚಕರು ತಮ್ಮ ಅಸಲಿ ಬುದ್ಧಿ ತೋರಿಸಿದ್ದಾರೆ.
“ನೀವು ಹಣ ವಿತ್ಡ್ರಾ ಮಾಡಬೇಕಾದರೆ ಒಟ್ಟು ಮೊತ್ತದ ಶೇ. 20 ರಷ್ಟು ಹಣವನ್ನು ಮುಂಚಿತವಾಗಿ ಕಮಿಷನ್ ರೂಪದಲ್ಲಿ ಪಾವತಿಸಬೇಕು” ಎಂದು ಹೊಸ ಷರತ್ತು ವಿಧಿಸಿದ್ದಾರೆ. ಅಷ್ಟೇ ಅಲ್ಲದೆ, ರೈತರು ಬಳಸುತ್ತಿದ್ದ ಆ ನಕಲಿ ಟ್ರೇಡಿಂಗ್ ವೆಬ್ ಪೇಜ್ ಅನ್ನು ಕೂಡ ಬಂದ್ ಮಾಡಿದ್ದಾರೆ.
ಕಂಪನಿಗೆ ಕರೆ ಮಾಡಿದಾಗ ಹೊರಬಿದ್ದ ಸತ್ಯ
ತಮಗೆ ಮೋಸ ಹೋಗಿರುವುದು ಮನವರಿಕೆಯಾಗುತ್ತಿದ್ದಂತೆ, ಸಂತ್ರಸ್ತ ರೈತರು ಬೆಂಗಳೂರಿನಲ್ಲಿರುವ ಆ ಮೂಲ ಟ್ರೇಡಿಂಗ್ ಕಂಪನಿಯ ಅಧಿಕೃತ ನಂಬರ್ಗೆ ಕರೆ ಮಾಡಿ ವಿಚಾರಿಸಿದ್ದಾರೆ. ಆಗ ಸೈಬರ್ ಕಳ್ಳರು ಆ ಕಂಪನಿಯ ಹೆಸರನ್ನು ದುರ್ಬಳಕೆ ಮಾಡಿಕೊಂಡು ತಮಗೆ ವಂಚಿಸಿರುವುದು ದೃಢಪಟ್ಟಿದೆ. ಸದ್ಯ ಸಂತ್ರಸ್ತರು ಶಿವಮೊಗ್ಗದ ಸಿಇಎನ್ ಪೊಲೀಸ್ ಠಾಣೆಗೆ ದೂರು ನೀಡಿದ್ದು, ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.
ಸೈಬರ್ ಸುರಕ್ಷತೆಗಾಗಿ ಈ ಮುನ್ನೆಚ್ಚರಿಕೆ ವಹಿಸಿ:
-
ಅಪರಿಚಿತ ಗ್ರೂಪ್ಗಳಿಂದ ದೂರವಿರಿ: ನಿಮ್ಮ ಅನುಮತಿ ಇಲ್ಲದೆ ಯಾರಾದರೂ ವಾಟ್ಸಪ್ ಅಥವಾ ಟೆಲಿಗ್ರಾಂ ಗ್ರೂಪ್ಗಳಿಗೆ ಸೇರಿಸಿದರೆ ತಕ್ಷಣವೇ ಅದರಿಂದ ಹೊರಬನ್ನಿ (Exit).
-
ಹೆಚ್ಚಿನ ಲಾಭದ ಆಮಿಷಕ್ಕೆ ಒಳಗಾಗಬೇಡಿ: ಅತಿ ಕಡಿಮೆ ಅವಧಿಯಲ್ಲಿ ದುಪ್ಪಟ್ಟು ಹಣ ನೀಡುವುದಾಗಿ ಹೇಳುವ ಯಾವುದೇ ಆನ್ಲೈನ್ ಟ್ರೇಡಿಂಗ್ ಲಿಂಕ್ಗಳನ್ನು ನಂಬಬೇಡಿ.
-
ಅಧಿಕೃತತೆ ಪರಿಶೀಲಿಸಿ: ಯಾವುದೇ ಕಂಪನಿಯಲ್ಲಿ ಹಣ ಹೂಡುವ ಮುನ್ನ ಅದು ಸೆಬಿ (SEBI) ಅಡಿಯಲ್ಲಿ ನೋಂದಾಯಿತವಾಗಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಿ.
-
ಸೈಬರ್ ಹೆಲ್ಪ್ಲೈನ್: ಒಂದು ವೇಳೆ ಆನ್ಲೈನ್ ವಂಚನೆಗೆ ಒಳಗಾದರೆ ತಡಮಾಡದೆ 1930 ಸಂಖ್ಯೆಗೆ ಕರೆ ಮಾಡಿ ದೂರು ನೀಡಿ.
